नेपाली हास्यव्यङ्ग्य अनलाइन पत्रिका

नवराज कार्की :

अर्काका कुरा खोतल्नु
कानबाट खानु
मुखबाट ओकल्नु
मजा आउँछ नि कुरा काट्दा
काट्नू, काट्नू
धित मारेर बोल्नू

भाषण ठोक्नेले भाषण ठोक्नू.
ताली ठोक्नेले ताली ठोक्नू
मजा आउँछ नि, कुरा काट्दा
काट्नू कहिल्यै नरोक्नू

चिलाए झैँ, कन्याए झैँ, ठुँग मारे झैँ
मानौं उसले सधैं जिते झैं
कहिल्यै नहारे झैँं
मजा आउँछ नि कुरा काट्दा
आकाशका तारा झारे झैँं
राम्रो जति उसैले ठीक्क पारे झैँ
नराम्रो जति अर्कैले
सबै बिगारे झैँ
मजा आउँछ नि कुरा काट्दा
ठूलै बाजी मारे झैँ

कुरा काट्नेकै कुरा गरौं भने
सि.आई.ए, के.जि.बि. रअ. के हुन् त ?
देउताको पालाका ती नारद को हुन् त ?
काटौं अर्काका कुरा मजाले
कुरा काट्न हतियार चाहिँदैन
मान्छे भएपछि मान्छेकै कुरा काट्ने त हो !
जति रिस उठे पनि,
मान्छे काट्न त पाईंदैन

भन्नु होला- यो तपाईंले के गरेको नि ?
यो त हेर्नोस् मैले
कुरा काट्नेका कुरा गरेको हो
फूल आफैमा रंगीन थियो,
मैले त खालि बुट्टा भरेको हो
मजा आउँछ नि कुरा काट्दा
हो, मैले पनि त्यही गरेको हो ।

०००
फेब्रुअरी २४, २०२४

अमेरिका