नेपाली हास्यव्यङ्ग्य अनलाइन पत्रिका

केशव ज्ञवाली ‘आगत’ :

कथाले संस्कारको सुन्दर घर र
सम्बन्धहरूको
सुशील भर मागेको थियो तर
मान्छेहरूले
भ्रष्टाचारका महलहरू बनाइदिए ।

कथाले शिक्षाको सूर्य मागेको थियो तर
मान्छेहरूले
अन्धविश्वासको अँध्यारो फैलाइदिए ।

कथाले समय र समृद्धिका
सम्भावनाहरू मागेको थियो तर
मान्छेहरूले
भयावह गरिबीको चक्रव्यूह बनाइदिए।

कथाले शान्तिपूर्ण परिवेश मागेको थियो तर
मान्छेहरूले
युद्धका घातक प्रतीकहरू बनाइदिए ।

कथाले जिउँदा पात्रहरू मागेको थियो तर
मान्छेहरूले
प्लास्टिकका केही डमीहरू बनाइदिए ।

कथाले जीवन र
जगतको
नवीन कथावस्तु र
शिल्पको सौन्दर्य
मागेको थियो तर
मान्छेहरूले
पुरानै कथावस्तु
पुरानै शिल्पमा सुनाइदिए ।

कथाले जिन्दगीको
अनुभव मागेको थियो तर
मान्छेहरूले
मृत्युपछिको
काल्पनिक सूत्र बताइदिए ।

०००
रुरुक्षेत्र,गुल्मी
हाल सूर्यविनायक, भक्तपुर।