असङ्गति
आफैँभित्र छ निरङ्कुशताको सिङ्गो दुश्चरित्र तर तिमी अन्य मान्छेहरूमात्र नाङ्गो आँखाले निरङ्कुश देख्छौ र पो ! भन्न त तिमी कतै प्रेम कतै करुणा र कतै अस्पताल पनि भन्छौ तर कतै स्कुल भत्काएर जेल बनाउँछौ र पो !
केशव ज्ञवाली ‘आगत’ :
मान्छे आफैँभित्र छ सामन्त
जो कहिले
आफैँमाथि र
कहिले अरुमाथि शासन गर्न खोज्छ
तर तिमी
बजारका सामन्तहरूको मात्र कुरा गर्छौ र पो !
पुल बनाउँदा बनाउँदै
कतै भेटिएको थियो एउटा नायक तर
पूरा हुँदा नहुँदै
उसभित्र पनि
जन्मिँदो रहेछ एउटा खलनायक र पो !
आफैँभित्र छ
निरङ्कुशताको सिङ्गो दुश्चरित्र
तर तिमी
अन्य मान्छेहरूमात्र
नाङ्गो आँखाले निरङ्कुश देख्छौ र पो !
भन्न त तिमी कतै प्रेम
कतै करुणा र
कतै अस्पताल पनि भन्छौ
तर कतै
स्कुल भत्काएर जेल बनाउँछौ र पो !
०००
भक्तपुर