नेपाली हास्यव्यङ्ग्य अनलाइन पत्रिका

टङ्कराज ढकाल तितेपाती :

म खाऊँ र लाऊँ धनी बन्न पाऊँ
म बाँचौं र नाचौं सफा लाग्छ ठाऊँ
रडाको चलाई खुबै हाँस्न पाऊँ
बफादार बन्दै गरेको छु म्याऊँ ।१

विदेशी छ ताना चलेको छ दाऊ
खजाना लुटाई मिलेको छ भाउ
सिमाना घटेको खुराफात घाउ
कुसंस्कार धारी बसेको छ म्याऊँ ।२

यता कुम्भ मेला अघाएर जाऊँ
छ जुत्ता र छाता सुरामा रमाऊँ
म नै धुन्धुकारी बिरालो कजाऊँ
अधिग्रो छिमेकी सधैं पुज्न पाऊँ ।३

म लाठे छु बाठो हसुर्दै अघाऊँ
अघाएर होला जरासम्म जाऊँ
जरासन्ध बन्दै दलाली जुटाऊँ
छ आदेश कस्को गरेको छु म्याऊँ ।४

म शिक्षा र दीक्षा उतैको बनाऊँ
मलामी उसैको गुलामी जुटाऊँ
हरामी म जस्तो हुँदैनन् चिनाऊँ
पराया कलोमा भुलेको छु म्याऊँ ।५

हियो भ्रष्ट पार्दै म आमा गुमाऊँ
दियो नष्ट गर्दै सलेदो बुकाऊँ
जसै अस्मितामा परेको छ धाउ
खरानी घसेको म भोगी रमाऊँ ।६

०००
नवलपरासी