नेपाली हास्यव्यङ्ग्य अनलाइन पत्रिका

मेघराज पौड्याल :

खुर्पा नित्य भिरेर जीर्ण पटुका कस्नेहरू हो उठ
छाप्रो एक बनाइ गाउँ नजिकै बस्नेहरू हो उठ
रोडा मात्र पिटेर त्यो सडक मै ठोक्नेहरू हो उठ
आधारात सुतेर बोझ मनको बोक्नेहरू हो उठ ॥१॥

सुक्खा नित्य मकै भुटेर दिनमा टोक्नेहरू हो उठ
खोचोमा धमिलो उघाइ जल त्यो धोक्नेहरू हो उठ
शिक्षा आर्जन गर्न खातिर निशा घोक्नेहरू हो उठ
बेल्चाबाट खनेर त्यो जलधि नै रोक्नेहरू हो उठ ॥२॥

गिट्ठो भ्याकुर मात्र नित्य घरमा खानेहरू हो उठ
बेठी तिर्न अझै ठुला महलमा जानेहरू हो उठ
साँप्रो वैभवमा सिसार कदली लानेहरू हो उठ
चर्को ब्याज तिरेर ती पर कतै जानेहरू हो उठ ॥३॥

अर्काको धरती लिएर कुतमा खेती गरेका उठ
सामन्ती कुलको अनन्त भयले बस्ती सरेका उठ
आफ्नो आर्जनबाट धान्न नसकी नाङ्गै परेका उठ
खोलाको पुल खर्च तिर्न नहुँदा पौडी तरेका उठ ॥४॥

तातो रापसँगै फलाम सजिलै गाल्नेहरू हो उठ
काँसो रत्न पिटेर नित्य घनले ढाल्नेहरू हो उठ
फाटेका कपडा तुनेर सबका टाल्नेहरू हो उठ
जो शौचालय भित्रको मल सधैँ फाल्नेहरू हो उठ॥५॥

मत्ता बैँस लगेर जो जलधिमा फाल्नेहरू हो उठ
ढुङ्गो नित्य कुटेर त्यो बगरमा चाल्नेहरू हो उठ
ज्यामी काम गरेर सन्तति सधैँ पाल्नेहरू हो उठ
बस्तीका विचमा निरन्तर टुकी बाल्नेहरू हो उठ ॥६॥

भारी त्यो मनकोसँगै तुइनमा तर्नेहरू हो उठ
तर्दा बोझसँगै कतै जलधिमा झर्नेहरू हो उठ
बारी छैन बसेर त्यो बगरमा खन्नेहरू हो उठ
पाऊँ गाँस र बास नित्य कपडा भन्नेहरू हो उठ ॥७॥

०००
कन्चनरुप ७ आदर्शटोल, सप्तरी