नेपाली हास्यव्यङ्ग्य अनलाइन पत्रिका

रमेश खकुरेल :

पथभर कुत्तै कुत्ता घुम्छन्
जुन बाटो पनि यी भेटिन्छन्
भर गर्नु हुने यौटै छैनन्
जो भेटे पनि यी झम्टिन्छन् ॥

टोपी भेटे टोपी बोक्छन्
जुत्ता पाए जुत्ता टोक्छन्
कोही आए बाटो रोक्छन्
डण्डा खाए टाप ठोक्छन् ॥

जात मिले पनि पात नमिल्ने
हात मिले पनि आँत नमिल्ने
भात भएपछि दाँत निकाल्ने
चढाइ गर्दै टोकी ढाल्ने ॥

बोली मात्र छ ‘गो’ ‘गो’ गर्ने
तल परिएपछि ‘ऐया’ भन्ने
टुक्रा फाले कुइँकुइँ गाना
लाछी देखे तान्छन् नाना ॥

धन्य छ भगवन् यी मिल्दैनन्
यिनका साझा लक्ष्य हुँदैनन्
नत्र त दुनियाँ खत्तम पार्थे
मुलुकै अन्तै परतिर सार्थे ॥

०००
कमलपोखरी, काठमाडौं