नेपाली हास्यव्यङ्ग्य अनलाइन पत्रिका

हरिप्रसाद घिमिरे :

साँढे सधैँ छोड्न हुँदैन खाए
ती भ्रष्टचारी सजिलै अघाए
किसान मारी ठगुवा सपारे
नेपाल हाम्रो सब दग्ध पारे ॥१ ॥

छट्टाउँदै छ्न् मुलुकै सकाए
सत्पात्रलाई तिनले थकाए
बाछा र बाच्छी सब टम्म पारे
साँढे हुने आज सबै लघारे ॥२ ॥

दोसाँधमा जुध्न परेन हारे
लिएर खाए सब हात पारे
तिनै सबै जुध्न सिपालु गोठ
सीमा कटी खोल्न न सक्नु ओठ ॥३ ॥

जम्मा भए चार मिलेर खान
के हुन्छ होला यसको निधान
भन्दै युवा जाग भनी बढेका
न छोड्नु त्यो गोठ न छन् पढेका ॥४ ॥

गुराँसको सुन्दर शान्त देश
साँढे भए चोर यहाँ विशेष
हिमालको सुन्दर सान हेर
निकाल साँढे अब नीति फेर ॥५ ॥

०००
गोरखा, हाल काठमाडाैं