नेपाली हास्यव्यङ्ग्य अनलाइन पत्रिका

नदी भट्टराई :

चाप्लुसीले भजन सपारेपछि
वाद्यवादकले भावी उत्तराधिकारीको निम्ति
माटाको मासिक धर्म रोकिदिएको बेला-
कोही देशलाई मधेश भन्छन्
कोही मध्यकालीन राई बन्छु भन्छन् र तराई खान्छु भन्छन्
कोही राष्ट्रलाई पर- राष्ट्र बनाउँछन्
कोही मासि रित्तिएको हाडसहितको पहाड मेरै हो भन्छन्
कोही देशकै उच्च गरिमा बोकेको
माल हि- माल तिब्बतको हो भन्छन्
गजब छ मित्र ! देश र सन्देश !

यहाँ लोकतन्त्रको सङ्घी – यता न यता न उता
सुदामाहरूको वस्तीमा
कारै कार भएको सर- कार भएको बेला –
भ्युटावरले आकाशिने रहर बोकेपछि न हो
बुढीगण्डकीको कोक्राबाट अक्षरका कलिला कखराहरू
पिङ खेल्ने रहर बोकेका
भोगविलासी जिन्दगीको नेतृत्व भएको देशमा
ती सारथि भन्दा ठूला त ती मुनाहरू पनि होइन रहेछन्
जसले चुहिने छानोको मुनि भविष्य पोते
जसले निराशा र ऊर्जाको रङ पोतिएको विद्यालयमा
वर्षौँ श्रम, शक्ति र पसिना खर्चिए
र अन्तिममा
जाबो मास्टर ! को उपाधि ग्रहण गरेर फर्किए !
कमाउनुहोस् महोदय ! टन्न कमाउनोस् !
केन्द्रदेखि वार्डसम्म नियम बनाउनोस्
नियमको मनखुशी विनियम बनाउनोस् र लुट्नोस्
लुट्ने कला प्रवर्द्धनको निम्ति कार्यालयैपिछे

कोट, टाई र ढाकाटोपीको हुलियाका
मुन्द्रे चोरहरू नियुक्ति गर्नोस्
धेरै किन पो चाहियो र ?
केन्द्रमा लुट्नको निम्ति
आचार नभएपछि आ ! चार भए पुग्छ !
चाख्नलाई छेउबाटै जुठो लगाए हुन्न र ?
जसरी बसको अन्तिम सिटमा बसेर पनि गन्तव्यमा पुग्न सकिन्छ
गजब छ मित्र ! देश र सन्देश !

राष्ट्र र देशको परिभाषा विरोधाभाषमा परेर
सार्वभौमसत्ता अपाङ्ग भएको बेला –
बाढीपहिरो, रोगभोक र शोकका अगाडि
सरकार अग्रगामी नामर्द सावित भएकै छ
दाताहरूबाट बाँडिएको स्वार्थी मिठाई
नेताहरूका डस्विनमा मल बनेका छन्
हिजो मात्र छिरिङ लामाका छ परिवार
पहिरोमा सदाका निम्ति निदाए
७२ वर्षीय विधवा दमिनी कान्छीले
हेल्थपोष्टबाट प्राप्त गर्ने निःशुल्क औषधिको सट्टा
म्याद नाघिएको सिटामोल खाएको धेरै भयो
जुवाघर (क्यासिनो) र होटलहरूमा
देहव्यापार बाध्यात्मक बनेको छ
पाठेघरको अप्रेशनको सट्टा किड्नीका व्यापार गर्ने
सेता कोटहरूको विगविगी छन्
यो अतिवाद कहिलेसम्म हो थाहा छैन
तर पनि,
गजब छ मित्र ! देश र सन्देश !

०००
इलाम