नेपाली हास्यव्यङ्ग्य अनलाइन पत्रिका

कृष्णदेव रिमाल  :

हजुरको लवाइ खवाइ सम्झन्छु
महल बगैंचा यार्ड कार सम्झन्छु
हुक्के छाते ब्यागे ट्यागे सम्झन्छु
यो पदको सधैं जय होस् भन्ठान्छु ।

झेलीहरूले अर्कै साँठगाँठ गरेछन्
दुइजिब्रेहरूले फेरि कान भरेछन्
लाएको र खाएको त देखिसहेनन्
मान्छेको जात विश्वासयोग्यै रहेनन् ।

हुन त हिजो हजुरले उसै गरिस्या हो
फेरि पनि नगरिसेला भन्न सकिन्न
हजुरहरूको तिकडम गन्न सकिन्न
उलट्पुलट उथलपुथल जान्न सकिन्न ।

म पनि हजुरकै बगैंचाको एउटा माली
फूल गोडेकै छु, सकेको धन जोडेकै छु
कहिले हजुरको चाकरी गरेर जोडेको छु
कहिले उहाँलाई स्वस्ति गरेर जोडेको छु ।

हजुरको पनि चित्त दुखाउँन भएन
उहाँको पनि चित्त दुखाउँन भएन
के थाहा हजुर ! यहाँ पदको लिला
आज उहाँ भोलि हजुरलाई मान्नुपर्छ ।

खासगरी पद भन्नु पाउ त हो नि
हजुरको ज्यान बोकी हिँड्ने पाउ
हामी आफैंले शीरमा चढाउँछौँ
ब्यर्थै हजुरको भाउ बढाउँछौँ ।

पद भन्नु असारे मेघजस्तो रहेछ
कतै बेस्करी गड्गडाउँछ तर वर्षंदैन
कतै घाम चर्कंदाचर्कंदै क्षणमै दर्किन्छ
हजुरको पद महिमा अपरम्पार छ ।

०००
काठमाडौं