नेपाली हास्यव्यङ्ग्य अनलाइन पत्रिका

कृष्णदेव रिमाल ‘शब्दसेना’ :

म शेरजस्तै छु
मलाई मन्चमा शेखरहरू बसेको मन पर्दैन
म खड्गजस्तै छु
मलाई मन्चमा भीमहरू बसेको मन पर्दैन
म कमलजस्तै छु
मलाई मन्चमा लिङ्देनहरू बसेको मन पर्दैन
म रक्तपुष्पकमलजस्तै छु
मलाई बगैचमा अन्य पुष्प फुलेको मन पर्दैन ।

यो देशका प्राय मान्छे मजस्तै छन्
मन्चमा सधैँ आफैँ मात्र बस्नुपर्छ भन्छन्
काम गर्ने ढङ्ग नभए पनि
आफ्नो मात्र पूजा गर्नुपर्छ भन्छन्
के तपाईं हरेक दिन मेरो पूजा गर्नुहुन्छ ?
सिमे भूमेको पूजा गरेर मात्र धान फल्छ र !
धान रोप्नु पनि पर्ला गोड्नु पनि पर्ला
पानी लाउनु मल हाल्नु पनि पर्ला
अग्रजको सम्मान त गर्नैपर्छ
तर
कामै छाडेर तलुवा नै चाट्न त हुन्न नि !
त्यसैले काम गर्नुपर्छ
काम गर्नेलाई पूजा गर्नुपर्छ
आकाश पातल जोडेर
गफ मात्र हाँक्नेलाई हेर्नू हुँदैन ।
त्यसैले हामीलाई
नयाँ परिवेश चाहिन्छ
नयाँ काम चाहिन्छ
अनि पो समृद्ध देश पाइन्छ ।

०००
काठमाडौं