नेपाली हास्यव्यङ्ग्य अनलाइन पत्रिका

माणिकरत्न शाक्य :

यो हल्लैहल्लाको देश हो
यहाँ सद्धे कुराले हावा खान्छ
झुटो कुराले मान्छे तान्छ
नपत्याए हेर्नोस्
बौद्धमा नाग निस्क्यो
सबले भगवान्को अवतार ठाने
त्यहाँ पनि बेइमानी र कपट थियो
गणेशको मूर्तिले दूध खायो
दूध बोकेर जानेहरूको लाम लाग्यो
फोकटिया हल्लाले दूध खेर गयो
टेलिभिजनमा हनुमानले लड्डु खायो
हेर्ने दर्शकले खित्का छाडे
मात्रै एकछिनलाई रमाइलो ठाने
त्यसैले यो मुलुकमा सद्धे कुराले हावा खान्छ
झुटो कुराले मान्छे तान्छ
यहाँ सरस्वतीका पुत्रहरूको हल्ला खोई ?
यहाँ रोग, भोकले पीडित जनताको हल्ला खोई ?
सबै फोगटिया कुरामा मान्छेको ध्यान तानिएको छ ।
हल्लागिरी नै मानमनितोमा छानिएको छ
त्यसैले यो मुलुकमा
बेइमानीहरूको सल्लाह गर्ने वेश हो
यो हल्लैहल्लाको देश हो ।

०००
चावहिल, काठमाडौं