नेपाली हास्यव्यङ्ग्य अनलाइन पत्रिका

जगदीश्वर पाेखरेल :

माया गर्ने जनक जननी हेपिदै छन् अचेल ।
बालीनाली प्रतिदिन घट्यो छैन बाली फसेल ।।
मासे खाए विभव सकियो देश हाँक्ने गनाए ।
ढाँडे ढाँडे जति सब मिले देश खोक्रो बनाए ।।१

चिन्ता गर्ने मुलुकतिरको छैन चासो हरायो ।
बारी बाँझा दिन नसकिदै स्याल घोर्ले करायो ।।
हीरा मोती धपधप हुने राष्ट्र ध्वस्तै गराए ।
ब्वाँसा ब्वाँसा थर घर मिले देश खोक्रो बनाए ।।२

सत्ता धारी विचलित हुँदा त्रास नेपाल छायो ।
कालो स्वार्थी कपट छलले राज्यलाई चपायो ।।
थोत्रा माथा रजगज गरी ऱ्याल काढे निदाए ।
डाम्ना डाम्नी जति सब मिले देश खोक्रो बनाए ।।३

नेपालीको रगत पसिना खान पार रमाए ।
छोरा छोरी पर मुलुकमा रक्त बेच्छन् पठाए ।।
बूढा भाले मुलुक भँडुवा टन्न खाए अघाए ।
कुर्सी कुर्सी प्रतिदिन लडे देश खोक्रो बनाए ।।४

बिक्छन् आफैँ अभिमत दिने नोट पाए हजार ।
हेप्छन् वैरी सबल नहुँदा थाप्न झोली तयार ।।
हेर्दा हेर्दै मुलक डसुवा राष्ट्रमा सल्बलाए ।
आमा भन्छिन् सजग बन युवा देश खोक्रो बनाए ।।५

०००
पाउँदीबजार, लमजुङ
सम्प्रति- विष्णुदेवी आवास, सतुङ्गल