पदम दाहालराजधानी सहरको वृत्तचित्र
भव्य बङ्गालामा सुस्ताउने सुस्ताइरहेछन् आलिसान महलमा बस्न रुचाउने रुचाइरहेछन् नाक थुन्दै कार डोर्याएर तिनींहरू नै बाटो काटिरहेछन् ।
पदम दाहाल :
डुङ्डुङ्ती छ काठमाडौं उपत्यका र उसको चोक
डङ्गुर छ फोहोरको
नजिकै पुगेर राजधानी पिच्च थुक्छ
र, नाक छोपेर नदेखिने गरी लाग्छ अर्कै बाटो ।
भोकाएका भुस्याहा पाल्तुहरू
असबाफ दुर्गन्धका फाल्तुहरू
प्लास्टिक र झोलामा फालिएका वस्तुभाउमाथि
चलिरहेछ तानातान
फैलिरहेछ यत्रतत्र दुर्वृत्ति
जहाँ हरिया झिँगा, कन्सुत्ले र पुतलीहरू भन्किरहेछन्
नियामक निकाय टोलाएको छ
मान्छेहरू फन्किरहेछन्
उफ्रिरहेछन् सारौंँ र कागहरू
र, उही दृश्यमाथि नाचिरहेछन् बकवादहरू ।
साँझदेखि उज्यालो नफक्रिउन्जेल
जम्मा हुन्छन् डाको छोड्छन् हुच्चिल र स्याल
देशको हबिगत बकिरहन्छन्
देशले बिसाएको छ चुनाबी माहोल
हराएको छ गालीगलौज र चहलपहल
डुङ्डुङ्ती उस्तै बोकिरहेछ मेरो राजधानी सहर ।
भव्य बङ्गालामा सुस्ताउने सुस्ताइरहेछन्
आलिसान महलमा बस्न रुचाउने रुचाइरहेछन्
नाक थुन्दै कार डोर्याएर तिनींहरू नै बाटो काटिरहेछन्
अतिथि महोदयहरू
मन्दिरैमन्दिरको सहर नियाल्दै
चोक र सडकको जगर–बगर छिचोल्दै
क्यामेरैपिच्छे कैद गरिरहेछन्
अभ्यागत विदेशी पर्यटकहरू
मेरै राजधानी सहरको वृत्तचित्रलाई ।
०००
मादी न.पा. ६, सङ्खुवासभा
हाल, लोकन्थली, भक्तपुर, ९८४२०९९८३१
Subscribe
Login
0 Comments
Oldest
