नेपाली हास्यव्यङ्ग्य अनलाइन पत्रिका

राजकुमार लामिछाने :

ए बटुवाहरू !
यता नजिक पर्दै नपर
रिसले आँखा तर्दै नतर
देखेनौँ टैङ्करले कसरी
सडक धुँदैछ ?
माननीय मन्त्रीज्यूको सवारी हुँदैछ ।

ए सवारी चालकहरू !
सवारी चलाउन रोक
बरू ओर्लेर सलाम ठोक
चाल पाएनौ साइरनको आवाज
कसरी कुर्लिदैछ ?
माननीय मन्त्रीज्यूको सवारी हुँदैछ ।

धेरै डिष्टर्भ नगर !
साइकल, टेम्पो, मयुरी र ठेला
उद्घाटनमा रिवन काट्न भइसक्यो अवेला
बरू उहाँको गुणगान गाऊ र थपडी बजाऊ
वा ! हाम्रो भोट खुशीले कसरी रमाउँदैछ ?
माननीय मन्त्रीज्यूको सवारी हुँदैछ ।

देखेनौ !
उहाँका अघिपछि जम्बोटोली रहेको छ तैनाथ
यस्तो दृश्य बडो गजबले हेर्दा हुन् श्री पशुपतिनाथ
उनी पनि हर्षले गदगद हुँदै मनमनै भन्दा हुन्
वाह ! नेपालीले तिरेको कर कसरी मौलाउँदैछ ?
माननीय मन्त्रीज्यूको सवारी हुँदैछ ।

अघिपछि !
काठमाडौंमा रत्तिएर बस्ने
निर्वाचन आएपछि आत्तिएर गाउँ पस्ने ।
बेलाबेला बथानसहित बत्तिएर विदेश टाप कस्ने ।
हेर्नोस् त ! उहाँको योगदान संसारभर कसरी फैलिँदैछ ?
माननीय मन्त्रीज्यूको सवारी हुँदैछ ।

गाउँवस्तिहरूमा
समृद्धि ल्याउछु भनेर खुब लड्नुभयो
धोक्राभरि आश्वासन बाढ्दै अगाडि बढ्नुभयो
आखिर समृद्धि शहरका महलहरूमा भेटिएपछि
हेर्नोस त ! अहिले उहाँका मुहारमा कसरी चमक छाउदैछ।
माननीय मन्त्रीज्यूको सवारी हुँदैछ ।

०००
हेटौंडा -४, मकवानपुर