नेपाली हास्यव्यङ्ग्य अनलाइन पत्रिका

रमेश खकुरेल :

सुनेको थिएँ खूब हल्ला र खल्ला
गयो रात कालो नयाँ ज्योति बल्ला
चढें हौसिंदै माथिका तीन तल्ला
सबैतर्फ देखें बकुल्लै बकुल्ला ।।

गयो रूख भन्छन् बसेमा बकुल्ला
यहाँ रूख ढाकी छपक्कै बकुल्ला
हरे रूख यो के गरी बाँच्न सक्ला
जहाँ राज गर्छन् बकुल्लै बकुल्ला ।।

बडो ध्यानमाझैं दुई बन्द आँखा
नियाल्छन् सबै चीज बन्दै चनाखा
जहाँ हुन्छ माछो कि पिर्लिक्क डल्ला
उघारेर टिप्छन् टपक्कै बकुल्ला ।।

०००
कमलपाेखरी, काठमाडाैं