नेपाली हास्यव्यङ्ग्य अनलाइन पत्रिका

ई. कुमार खड्का :

सुमेरु परिक्रमाको दिव्य अठोट कुमारले जगाउदा
खोजपत्तो छैन चिन्ताको भुमरी कैलाशमा छाउदा
सुमेरुनै हुन् माता र पिता भनि पाउ ढोग्दा गणेशले
चाकरी उत्तम प्रमाणित हुन्छ वरदान अघि पाउदा ।

सृष्टिकर्ता ब्रम्हाजीको मठ, मन्दिर नहुदा भ्रममा
संहारको त्रासले लिङ्ग पुजन, शिबको आराधनामा
सत्यवादी युधिष्ठिरको नाम, काम फिका छ, बरु
शक्ति पूजन या भिमको मान जात्रा,होम,अर्चनामा ।

सर्प दोष दमनगर्ने गरुडको कर्मले मर्म छुदैन
विषधारी सर्प, नाग रुपमा पुजा नगरी धर हुदैन
तिघ्रेतन्त्र र शक्ति पात्र सम्मानित हुने समाज यो
विकृत संस्कारमा चेत नहुदा त्यो आँखा रसाउदैन ?

स्वाभिमानको छातीमा फूलको सुगन्ध बसाउछ
दासताको चङ्गुलले जरो मौलिकताकै धसाउँछ
चोरी, ढाँटमै मस्तिको जीवन जिउने रवैया कलिमा
आत्मसम्मान ध्वस्त हुदै गए अस्तित्वहिन गराउछ ।

विधीलाई नफेरे चाकारीको नाटक जिवन्त रहन्छ
मनले मस्तिष्कका हीन भावका रजाइँलाई सहन्छ
हज्जारौं वर्षको दास वृत्ति कसरी ‘फु’ मा हराउला ?
एथास्थितिमा समाजको गति पिछ्लग्गु हुदै बहन्छ ।

०००
आलापोट, काठमाण्डौं ।
२०८१/१०/२६