नेपाली हास्यव्यङ्ग्य अनलाइन पत्रिका

रमेश खकुरेल :

चकलेट लिएर खुसुक्क गयौ
तर लेट गयौ र लुरुक्क गयौ
चक चूर्ण लिई करभित्र गयौ
गुरुजी किन गीत सुसेल्न गयौ ।।

ललना कुन छन् र यहाँ जगमा
जसका मनमा गुरुको सपना
धन नै धनको छ जहाँ रटना
अनि के बुझियोस् गुरुको महिमा ।।

चकलेट किनी न त खान सक्यौ
न त खान सिकाउन भन्न सक्यौ
चकलेट नखा तँ नखा तँ नखा
यतिबाट लियौ महिनौं तनखा ।।

सबले चकलेट दिए त दिए
प्रियका प्रिय साथ लिए त लिए
किन लोभ गर्‍यौ मनबाट झर्‍यौ
तरुमा न रह्यौ भुइँमा न पर्‍यौ ।।

चक फाल लगी कुच डष्टरले
सपना लिनु दु:ख छ माष्टरले
सुन कुण्डल कान लिएर भिर
अब यज्ञ नगै पबभित्र छिर ।।

गुरु, छात्रहरूसित माग बिदा
सिक दण्ड र बैठकको रमिता
बलिया लठुवा जन साथ चुन
जसरी तसरी गुरु डोन बन ।।

अनि हेर न आउँछ के रमिता
चकलेट लिई कतिका वनिता
कुन खानु तथा कुन छोड्नु गर
गुरु माष्टर कर्म लिई नमर ।।

०००
कमलपाेखरी, काठमाडाैं