नेपाली हास्यव्यङ्ग्य अनलाइन पत्रिका

लक्ष्मण नेवटिया :

कुराबाट मन नपरेको कुरा निकालेर
बचेको कुरामा कहिले विचारको
भाग लाउनु हुन्छ।
कहिले घटाउ,कहिले गुणा गर्दै
कुरा लम्ब्याउनु हुन्छ।
त कहिले छोट्याउनु हुन्छ।

कुरा त हो,
कुरै कुरामा उनले
मूल गर्नु पर्ने कुरा फुत्काउनु हुन्छ।
कुलो जस्तै भएर कुरो
उतै लाग्छ जता कोट्याउनु हुन्छ।

बनेको कुरा कहिले बिगार्नु हुन्छ
कहिले बिग्रन नदिइ स्वीकार्नु हुन्छ।
कहिले कुरामा टक्क अडिनुहुन्छ।
कहिले कुराले छक्क पर्नुहुन्छ।

उनका कुराले कहिले सत्य रोप्छ,
कहिले सत्य छोप्छ।
कहिले पीर त कहिले खीर दिन्छ
कहिले मुटुलाई नै घोच्ने तीर दिन्छ।

कहिले फूल कहिले काँडा जस्तो।
कहिले डामेको साँढे छाडा जस्तो।
धेरै भइसक्यो कुराको नालिबेली
तर कहिले हुँदैन कुरा पूरा ।

जति गर्दा पनि –
कुरै कुरामा कुराका कुरा।

०००
विराटनगर