नेपाली हास्यव्यङ्ग्य अनलाइन पत्रिका

पदम दाहाल :

आशा खुबै अगतिला पगिता रहेछन्
हालेर गाँस गतिला नअघाउने झन् ।
औताउँदा पनि प्रपञ्च प्रथा पलाए
थाम्नै सकेन घरले सुविधा कजाए ।१।

नेतृत्व नायबहरू मतपत्र खोल
नाराज देश बबुरो अलपत्र तोड !
झुक्याउने छवि बनोट लुछी कमाए
सैतान गोमन समान ढुकी रमाए ।२।

लुट्ने हिसाब व्यभिचार दशा नपाल
भो लोकतन्त्र बिचरो खिचलो नपार !
ठाडो जवाफ नगरी पर फाल दोष
नालायकीपन नराधम स्वप्नदोष ।३।

मान्छे कृतघ्न किन पो कृपणी कठोर ?
मैलो छ भित्र अपवित्र नहुन् अघोर !
देखिन्न त्यो सफलता घर खै उज्यालो ?
सम्पन्न वैभवजुनी रमिता पजँेरो ! ।४।

दुर्गन्ध चाल अवगाल उचालिंदैछन्‌
विश्वासघात भरिभन्ड भए अझै झन् ।
जोडेर हात मत मात्र नहुन् विनाश
आक्रान्त चोट अतिसार घटून् निराश ! ।५।

यो लोकतन्त्र विचरो किन बौरिएन ?
भो भीडतन्त्र भरिलो यश पौडिएन
खिल्ली कठै नकचरो चर भासिए झैँ
सक्ला उकास्न अधुरो कसले बिहानै ? ।६।

त्यो भोकतन्त्र छिचरो छ कि भोक जाग्ने ?
भो भ्रष्टतन्त्र गिजलो दश दोष लाग्ने ।
धुत्ने समाज छ यहाँ सुख शान्ति छल्ने
आकाश निर्मल खुलोस् नव कान्ति भर्ने । ।७।

०००

मादी न.पा. ६, सङ्खुवासभा । हाल, लोकन्थली, भक्तपुर ।
९८४२०९९८३१