नेपाली हास्यव्यङ्ग्य अनलाइन पत्रिका

राजेन्द्रप्रसाद अधिकारी :

अकर्मण्यताका काँडाहरुले घेरेर
पूर्खाले बनाइदिएको घरलाई
विवेकहीन घीनलाग्दा हरकतहरु गरेर घरभित्रै
लखेट्दै रह्यो घरबाट
आफ्ना छोराछोरी र नातिनातिनाहरु
बेच्यो पूर्खाले जोडिदिएको इमान‚ जमान र खेतबारीहरु
र निर्लज्ज भएर‚ काढेरै ऋण
चढ्यो महँगा गाडी र गर्यो शयर विदेशहरुको
पाल्यो मुष्तण्ड गुण्डाहरु
अनि एक्लै ढलिमलि गर्यो पूर्खाले बनाइदिएको घरमा

शक्तिको मात लागेर भैमा न भाँडामा भएर उम्लिरहेको बेला
घरको भूइँ तलाको बरण्डामा
गौंथलीले गूड बनाएको रिसले
जलायो आफ्नै हातले
आफ्नो सग्लो घर र पूर्ख्यौली धरोहर पनि
अनि त्यही जलेको घरको खरानीको रापमा अधकल्चिएपछि
बराबराउन थाल्यो कुनै मनोरोगी
र संझन थाल्यो आफ्ना सन्तान अनि नजिकका आफन्तहरु

के गर्छन् होला ती मनैदेखि टाढिएका
धुन्धुकारीका आफन्त र सन्तानहरुले
खरानीको भुतभुतेमा अधकल्चिएको मनोरोगीलाई
उद्धार गर्न सम्म पनि सकिरहेका छैनन् छिमेकीहरु
बात लाग्नेन डरले
आपसमा भने कानेखुशी गर्ने नै भए-
“को अनि कहाँ फर्कने होला र अब ?
खै! कहाँ छ र आदर्श घरको सग्लो स्वरुप
विचारको ढोका अनि नैतिक छेकबारहरु….।”

०००
२०८२ कार्तिक १५
चण्डाेल, काठमाडाैं