नेपाली हास्यव्यङ्ग्य अनलाइन पत्रिका

सुभाषचन्द्र देवकाेटा :

यता-उता सबै छोडौँ,
अब एउटा दुकान खोलौँ ।

दुकानमा-
एउटा स्टल नक्कली शरणार्थीको राखौँ ।
अर्को स्टल सहकारी ठगको राखौँ ।
मानव बेचबिखनको पनि स्टल राखौँ ।
सानै भए पनि
सुन तस्कर र भ्रस्टाचारको स्टल राखौँ ।
मिलेसम्म खोला,नदी बेच्न मिल्ने अर्को स्टल थापौँ ।

यति भयो भने,
स्वदेशी, विदेशी
ग्राहकहरुलाई
एउटै छाना मुनि
सबै सेवा,बस्तु बेच्न सकिन्छ ।
दुबै हातले सोहाेर्न पाइन्छ।

त्यतिले ठाउँ नपुगे,
अलिपर, अर्को घरमा,
वकिल स्टल राखौँ ।
पत्रकार र राजनीति दलसँगै
संसद र मन्त्री स्टल पनि राखौंँ ।
नीति नियम कानूनलाई
काट्न कैँची स्टल पनि राखौँ ।

यति गरेपछि,
देशमा,
लोकतन्त्र मजबुत बन्छ।
शहीदको सपना पुरा हुन्छ।
सुशासनको भेल बग्छ।
समृद्धिको मूल फुट्छ।
नेपाली काइदा।
जतासुकै फाइदै फाइदा।

आउ, अब एउटा दुकान खोलौँ ।

०००
गाेरखा