नेपाली हास्यव्यङ्ग्य अनलाइन पत्रिका

कलानिधि दाहाल :

विशाल विश्व म हेरी हिँड्छु यी शैल उक्लेर
चुँडिन्न लता सुकेझैँ वृक्ष शाखामा फुक्लेर !
उदय हुन्छ हरेक नयाँ चिजका चालमा
रहन्न थोपो जमेर विन्दु एउटै थालमा !!

उचाइ आफ्नै सङ्घर्षभित्र उज्यालो बन्दछ
हिँडेका पाउ गतिले विराट् यो विश्व चिन्दछ !
सङ्कीर्ण भाका सीमित पाखा मण्डूक घुम्दछन्
आकाश आस्था जोखिमी चिन्ने मनले चुम्दछन् !!

पहरोजस्तो पत्थरमाथि हरिया पातले
इन्द्रेणी रङ्ग छरेको हुन्छ प्रेमिल जातले !
फालेर हिलो जमेका दह समय निकाश
निकालूँ आफैँ सङ्घर्षभित्र जन्मन्छ प्रकाश !!

गन्जकभित्र सुनको सुगा के अर्थ हुन्छ र
मस्तिष्कशून्य भीडमा कतै आवाज हुन्छ र ?
मनका दिया बालेर उठ्नु अनन्त हाँक्नु हो
समय ऊर्जा उफार्न सक्नु अस्मिता आँक्नु हो !!

संसार आशा साँघुरो हुन्छ विश्वास ब्युँझाऊँ
हर्काको भर अधुरो छाडी आफैँमा मुर्झाऊ !
मनको बत्ती बलेमा हुन्छ रात नै उज्यालो
अँध्यारोभित्र एउटै हुन्छ मन नै उज्यालो !!

कुण्ठित हुने महलभन्दा स्वतन्त्र झोपडी
शिखर अग्लो चढेर नाच्छ एउटै खोपडी !
दासको पेट खाएको भन्दा स्वतन्त्र भोकमा
संसार जित्ने अठोट उठ्छ जोखिमी झोकमा !!

जोखिमविना जीवन हुन्न पहरो झरेको
छाडेर लट्ठी होमिनु मजा जङ्घार तरेको !
भीडमा बोली अन्तर खोली खै भयो बिहान
हातको आफ्नै उज्यालो हुन्छ शिरको सिरानी !!

कर्कलो पनि नहल्ली शीत झर्दैन धरामा
चुचोको चाल नउघ्री पेट भरिन्न चरामा !
हल्चलविना हल्लिन्न पात प्रेमका गरामा
दासता नै हो कुहेको बस्ती बनेका बरामा !!

हार नै हुन्छ नयाँको जीत उत्सव यताको
जीत नै हुन्छ पुरानो हार आँसुमा उताको !
डटेर हिँडूँ छहरो चुम्न छोएर निर्झर
न्यायको नौका जोखिममाथि बन्दछ सुन्दर !!

०००
कलेकुटी, काठमाडाैं