नेपाली हास्यव्यङ्ग्य अनलाइन पत्रिका

१.
जसलाई पसिना दिएँ उसले यो कुरा बुझेन
जसलाई रगत दिएँ उसले यो कुरा बुझेन
अब केही पनि बाँकी छैन मसँग रित्तोरित्तो भएको छु
जसलाई जिन्दगी दिएँ उसले यो कुरा बुझेन ।

२.
अचेल कुरा नबुझ्ने मान्छेमा दर्ता भएको छु म
अचेल कान नसुन्ने मान्छेमा दर्ता भएको छु म
तिमी नै छयौ टाठीबाठी, पढेलेखेकी म त गाउँको एउटा गँवार न हुँ
अचेल आँखा नदेख्ने मान्छेमा दर्ता भएको छु म ।

३.
माटो चोइटिएर गइसक्यो कसैलाई मतलब छैन यहाँ
पानी चुहिएर गइसक्यो कसैलाई मतलब छैन यहाँ
अरू त अरू, देशको लगाम समात्नेहरू पनि खालि घर झगडा मै रमाएका छन्
लँगौटी पनि च्यात्तिएर गइसक्यो कसैलाई मतलब छैन यहाँ ।

हेटौँडा– ४, अभिकुञ्ज
मित्रनगर, मकवानपुर (नेपाल)