नेपाली हास्यव्यङ्ग्य अनलाइन पत्रिका

अनकन्टार चारकोसे झाडीभित्र
डाँको छोड्दै छ घाम– क्वाँ क्वाँ
बिग्रिएको कचिया झैं छ इन्द्रेनी
निर्लज्ज पसारिएको, ङिच्च हाँस्दै
हातो फुस्किएको जाँतो
आफैं घुम्दै छ घ्वाइँ घ्वाइँ– नेपथ्यमा
उहुँ उहुँको कोलाहल सँगै
निस्के नकच्चरा स्यालहरू
दुङ्ग दुङ्ग गनाएको ज्यान
जिङ्रिङ्ग परेको घिनलाग्दो अनुहारमा
¥यालको लत्कोसँगै हर्षलाई अभिव्यक्त गर्दै
हाम्फाल्दै छन् खोलाको किनारतिर
जहाँ गाउँलेहरूले भर्खरै फालेका छन् बिशाल सिनो
र त्यसैले आज वृहद् बैठक छ ।

सभाध्यक्ष बन्ने छ क्रुर–जम्बो
जससँग सयौं–हजारौं सिनो फस्र्याएको अनुभव छ
छलफल–सूची तैयार पारेको धूर्त–जम्बोले
जो सँग दिग्गज– जम्बोहरूलाई लट्पट्याएको रेकर्ड छ
र, निर्णय तैयार गर्ने छ काइते–जम्बोले
जो शब्द खेलाई खेलाई डकार आजिर्ण माहिर छ
छलफल ब्यापक हुनेछ– उँगी उँगी, घुमी घुमी
पाखुरा सुर्कासुर्की पनि हुनेछ पक्कै
किन कि सिनोको “न्यायोचित“ बितरण गर्नु छ
खासमा, यसैको लागि आज पनि सधैं झैं बैठक छ ।

बैठक सधैं हुने गर्दछ समावेशी
र, आज पनि यो हुनेछ समावेशी
सम्पूर्ण स्यालहरूको प्रतिनिधित्व हुनेछ यसमा
सँगसँगै लठारिएका हुनेछन् स्याल स्यालिनीहरू
सँगसँगै मडारिने छन् बृद्ध झ्याउरा र छाउरा स्यालहरू
सबै जात, सबै धर्म र बर्गका स्यालहरू
ध्वाँसे, ब्वाँसे अनि मरन्च्याँसे सहित
सबैले राख्नेछन् धारणा र दिनेछन् सारगर्भित योगदान
बाँडचुँडको, गोपनीयताको र भबिष्यका योजनाको
प्रक्षेपण हुनेछन् भबिष्यका सिनोहरूको परिमाण
र फेरि पनि बस्नेछ बैठक
जसरी आज बैठक छ स्यालहरूको ।

अधिकारका भरमग्दुर वकालत हुनेछन् बैठकमा
कागाधिकार्, गिध्दाधिकार लगायत
किटाधिकारका समेत कुरा हुनेछन्
समतामूलक वितरण प्रणाली सर्बस्वीकृत हुनेछ
सभाध्यक्षको भागमा राजखानी र ह्याकुलो,
ढाड– गर्दन सचिवको अनि बाँकी अरूको
कागको निम्ति खप्पर र गिद्धलाई आन्द्रा–भुँडी
बाँकी रहने छैन सिङ र खुर समेतको बिभाजन
“शक्ति अन्सारका भक्ति” को सर्बसम्मत दर्शनमा
ओखर र पाङ्ग्रराहरूको अद्भूत मिल्तीको दिन छ
त्यसैले,
सधैं झैं आज पनि स्यालहरूको बैठक छ ।

यो अनकन्टार चारकोशे झाडीभित्र
कहिल्यै हाँस्न सकेनन् घाम
कहिल्यै नाच्न सकेनन् इन्द्रेणी
नेपथ्यका जाँतोहरूमा,
कहिल्यै ठोकिएनन् हातोहरू
खबरदार प्रकृति ! होस गर !
ईतिहासमा कोच्दै तिम्रा ती समयचक्र
नयाँ युगको थालनी हुनेछ अब
झ्यालखानमा कैद हुनेछन् क्रुर, धूर्त र काइते स्यालहरू
र, अन्त्य हुनेछ बिगबिगी यी दुष्टहरूको
उदय हुनेछ युग मृग, परेवा र चखेवाहरूको
सिनोको बाँडचुँडमा व्यतित हुने छैन काल
फेरि पनि बैठक भने बस्ने नै छ जङ्गलमा
शान्तिको, सह–अस्तित्वको र सद्भावको
कथनीमा मात्र हैन करनीमा पनि ।

काठमाडौं