नेपाली हास्यव्यङ्ग्य अनलाइन पत्रिका

बाचा सस्तो, विश्वास महँगो भो
भाखा सस्तो, निकास महँगो भो

सपना बुन्न र बेच्न सजिलो
खाका सस्तो, विकास महँगो भो

आडम्बर नै संस्कृति बन्यो
चाका सस्तो, पराग महँगो भो

आउरे बाउरे सबै नै गायक
गला सस्तो त राग महँगो भो

भएको ‘नाथे’ र नभएको ‘गाँठे’
साँप सस्तो र ‘नाग’ महँगो भो

मासिने भए खेती गर्ने जति
सस्तै बारीमा साग महँगो भो

कृत्रिमताको राज भो सर्बत्र
जङ्गल सस्तो र बाग महँगो भो

प्लटिङ र कट्पिसको समय
सिङ्गै सस्तो तर भाग महँगो भो

धुत्र्याइँको पो पूजा हुन लाग्यो
चिभे सस्तो र काग महँगो भो

क्या विज्ञापनको जमाना आयो वा !
भाषण सस्तो, तर त्याग महँगो भो

जीवनको खोइ र मूल्य यहाँ ?
आयु सस्तो, तर छाक महँगो भो

२०७१ कात्तिक
काठमाडौं