नेपाली हास्यव्यङ्ग्य अनलाइन पत्रिका

१.
चाकडीको वीर्य धोकेर ए महाशय !
पक्षपातको भुँडी नबोके हुन्थ्यो
अजीर्ण भएर नजरानाले
स्वच्छताको हजमोला नखोके हुन्थ्यो
कोठा थुनेर बिरालोलाई नकुट्नु भन्छन् नि हजुर !
विवेकको दैलामा अब त ताल्चा नठोके हुन्थ्यो ।

२.
भ्रष्टाचारले यो मुलुक आक्रान्त भैसक्यो
सदाचारको बिऊ छिटै छरिदिनु पर्यो नि हुजुर !
भ्रष्टहरूका दिमागमा पसेर आफैँले
अनुशासनका कुरा भरिदिनु पर्यो नि हजुर !
म पनि त हजुरजस्तै स्वच्छ छविको मान्छे
एकपटक त भन्सारमा सरुवा गरिदिनु पर्यो नि हजुर !

३.
ग्यारेज बनाऊ घरको छेउ
नभए के भो र मोटर कार
झुण्ड्याइदेउ मूलढोकामै
‘कुकुरदेखि होसियार !’

४.
हेत्तेरिका !!!
के बिधि नातावाद मौलायो हँ यो देशमा !
यो लाजमर्दै कुरा भो
यस केटाको कामचाहिँ हुनैपर्छ है जेठानज्यू
यो मेरो भाइको सालाकी श्रीमतीको
आफ्नै मीतभाइको छोरा हो ।

५.
खुकुरी ठूलो भएर हुन्न हजुर
चाहिने त आखिर पाइन् हो
जुलुस भनेर नतर्सिनुस् नेताज्यू
त्यो त विदेश जानेहरूको लाइन् हो
काठमाडौं