नेपाली हास्यव्यङ्ग्य अनलाइन पत्रिका

एक दिन हजुर बा
साह्रै बिरामी भएपछि
औषधी गर्ने भनी सहर हिँड्नु भो
जङ्गलमा डाकु भेटिएपछि
एकछिन त लड्नु भिड्नु भो
तर केही नलाग्ने देखेपछि
डाकुको अगाडि हातपाउ जोर्नु भो
दुःख दर्दको कथा, मजाको कोर्नु भो
डाकुलाई पनि दया आएछ क्यारे
दुई चार हजार मात्र दाम लिएछन्
हजुरलाई उल्टै
सुस्वास्थ्यको आशिक दिएछन्
त्यसपछि हजुरबा
हस्याङ फस्याङ गर्दै सहर पस्नु भो
भर्ना भएर त्यसै दिनदेखि
अस्पतालमा बस्नु भो
डाक्टरहरूले पनि
क्यालेन्डर हेर्दै
यमराजले झैं फटाफट
शल्यकृयाको मिति तोके
अपरेसन गर्दा
दुई सयको सामानलाई दुई हजार ठोके
अस्पतालको बिलले हजुर बा
फेरि मुर्छै परे
यसपाली त बिचरा झन्नै मरे
बेडमै बसी बसी बरबराउन थाले
डाक्टर हुन् कि डाँका साले
दुईटै हेर्दा एकै खाले
जङ्गलका भन्दा सहरका भाले
हेर नाति
तैँले तिरेस् है मेरो यो रिण
तिर्न सकेन भने, तेरो बाले ।
दाङ, हाल– काठमाडौं