नेपाली हास्यव्यङ्ग्य अनलाइन पत्रिका

न कोइली निराश भो न काग मौन देखियो
मनुष्य पो विषालु भो र नाग मौन देखियो ।

न बज्छ डम्फु, बाँसुरी न खैँजडी न मादल
स्वदेश वाद्यहीन भो र राग मौन देखियो ।

बनेर वाक्य वाण घाउ जो बन्यो निको भयो
भुलेछ पूर्व वेदना र दाग मौन देखियो ।

सिकार गर्छ चोरले ढुकेर जन्तु जङ्गली
बुझेछ तस्करी बढ्यो र खाग मौन देखियो ।

गुणी कि बैगुनी भनी बताउने स्वभाव हो
सरोज होस् कि भ्यागुता तडाग मौन देखियो ।

विवाहमा छ दाइजो, दबाब, स्वार्थ, शोषण
तटस्थ देखिने सधैं सुहाग मौन देखियो ।

विदेशमा गई युवा सडे नि जेलमा परी
निकाल्न हैन, बुझ्न नै विभाग मौन देखियो ।

अशान्त देशका युवा पढेर थन्किएपछि
विवेकहीन भैसके दिमाग मौन देखियो ।