दुर्गाप्रसाद ग्वालटारेरात रहे
रात रहे हात्तीबारमै अग्राख पलाउँछ
नपत्याउँदो खहरेले बस्ती बगाउँछ ।
एघारको पछि मात्र बाह्र बज्ने हैन
घडी माते जहिले पनि बाह्र बजाउँछ ।
कस्ले भन्छ झरी पर्दा मात्र मान्छे भिज्छ ?
टण्टलापुर घाम पनि ल्याफ्फै रुझाउँछ ।
बिनासित्ति माटोलाई किन गाली गर्नु
काउसोको गेडा रोप्दा के पो फलाउँछ ।
हौसिएको रोपो हेर्दै मख्ख पर्नु ब्यर्थ
धानको चिन्ह राम्रोसँग पराल बताउँछ ।
एकाघरका भाइ फुटे कुस्ताकुस्ती गरे
तिनका घरमा गवाँरको झण्डा फर्फराउँछ ।
२०७२ माघ ४, काठमाडौ
Subscribe
Login
0 Comments
Oldest
