नेपाली हास्यव्यङ्ग्य अनलाइन पत्रिका

कलियुग हो साथी कलियुग
यहाँ
नदेखेको कुरा देख्न सकिन्छ
नलेखेको कुरा लेख्न सकिन्छ
यहाँ रामकी सीतालाई अब
रावणले होइन
लक्ष्मणले उडाउन सक्छ
द्रुपती पनि कौरबसँग लागेर
पान्डवलाई धुलाउन सक्छ ।

कलियुग हो साथी कलियुग
यहाँ
बाजेले नातिनी हरण गरेको देख्न सकिन्छ
छोराले आमाको मरण गरेको देख्न सकिन्छ
यहाँ
बुहारी जेठाजुसँग हिंडेको
सासु बुहारीसँग भिडेको देख्न सकिन्छ ।

कलियुग हो साथी कलियुग
यहाँ
तिम्रो घर अग्लिँदा
तिम्रो छिमेकी रुन सक्छ
साझ बिहान आउने साथी
तिम्रो सत्रु पनि हुन सक्छ ।

कलियुग हो साथी कलियुग
यहाँ
तिमीले खाने भोजन बिष हुनसक्छ
बाहिर प्रशंसा गर्नेको भित्र रिश हुनसक्छ ।

कलियुग हो साथी कलियुग
यहाँ
कालोलाई पनि सेतो लेख्न सकिन्छ
राममा रावणता रावणमा रामता देख्न सकिन्छ
यहाँ मन लाग्यो भने
छोरोले बाआमालाई सडकमा फाल्न सक्छ
बरु घरमा कुकुर पाल्न सक्छ ।

कलियुग हो साथी कलियुग
यहाँ
कालीयुग लागेपछि
बजारमा कलियुग छ
सरकारमा कलियुग छ
एकमा होइन दुईमा होइन
यहाँ हजारमा कलियुग छ ।

दाङ, हाल : काठमाडौं