नेपाली हास्यव्यङ्ग्य अनलाइन पत्रिका

आफै बनाइएको अलङ्घ्य पर्खालको
चक्रव्यूह झैं परिधिभित्र
आफै गढिएका वाध्यताहरूको
हतकडीमा जेलिएर
कैदी भएको यौटा म ।

राम्रो म को भ्रम पालेर
भकारी भ को टाउकोमाथि
डिको जोडेर म बनाउँछु
कैले काहीं पातलो स को
खुट्टो भाँचेर म बनाउँछु ।

निहुरिएको न को मुण्टो
हल्लुँडले झुण्ड्याएर
जबर्दस्ती टाउको उठाएर
राम्रो बनाइएको
यौटा म ।

कति कोमल वाध्यताका हतकडी
कति होचो भ्रमको पर्खाल
चाहेरै होला नछिनाई
नभत्काई आफ्नै खुशीले
कैदी भएको यौटा म ।

फोनको घण्टी बिजुलीको बिल
नमस्ते हजूर मर्का पर्यो
नैतिकताको अवमूल्यन
नजाने कुन बैंकले गर्यो
हल्लुँड पनि तन्कँदै छ
निहुर्मुण्टो निहुरिंदैछ ।

मुण्टो तन्काउने बलियो डोरी
कुन मुलुकमा पाइन्छ होला
ग्लोवल टेण्डर गर्नु पर्यो
नत्र बिचरो म यसै मर्यो
मुण्टो झन् झन् तल झर्यो ।

काठमाडौं