नेपाली हास्यव्यङ्ग्य अनलाइन पत्रिका

यता देश छाँस्ने उता देश टाँस्ने,
कुरा यी नमानेपछि ज्यान मास्ने,
दुले चोर पस्दैछ फोरेर दैलो,
त्यसैले बनेको छ नेपाल नौलो ।।

लफङ्गा र झल्ला बढे यत्रतत्र,
भए कुन्डले मन्डले झन् प्रसस्त ।
यिनैले गरे देशमा भाँडभैलो,
त्यसैले बनेको छ नेपाल नौलो ।।

हिमालीय छानो छ यो देश सानु,
सधैं नै यहाँ पर्छ मागेर खानु ।
यिनै दीनका निम्ति गाडिन्छ मौलो,
त्यसैले बनेको छ नेपाल नौलो ।।

उता गाउँमा मर्न लागे गरीब,
यता केन्द्रमा मोजमस्ती अतीब ।
दुखीेका मुखैमा त लाग्दैछ जालो,
त्यसैले बनेको छ नेपाल नौलो ।।

छली ओठले भन्दछन् संविधान,
सबै छन् बसेका यही देश खान ।
दुखी गाडिने नित्य बढ्दैछ खौलो,
त्यसैले बनेको छ नेपाल नौलो ।।

यहाँ भाइभाइ स्वयं शत्रु भा’छन्,
दयाधर्म सारा हराएर गा’छन् ।
बगेको छ उर्लेर जातीय खोलो,
त्यसैले बनेको छ नेपाल नौलो ।।

पुरानो भयो देशको संस्कृतित्व,
भनी ल्याइँदैछन् विदेशीय वस्त्र ।
कठै जेलमा छन् नि साडी र चोलो !
त्यसैले बनेको छ नेपाल नौलो ।।

सुरा सुन्दरीमा अडेकोछ सत्ता,
तिनैले मनग्गे थपेको छ भत्ता ।
पुरा देश काम्दैछ लागेर औलो,
त्यसैले बनेको छ नेपाल नौलौ ।।

उहिल्यै थिए जातमा चार मात्र,
हिजो आज छन् प्याजझैं पत्रपत्र ।
यसै गर्न नेता भएको छ पैलो ।
त्यसैले बनेको छ नेपाल नौलो ।।

झापा