दुर्गाप्रसाद ग्वालटारेब्यर्थ छ
हिमाल चढ्छु भनेपछि थर्थराउनु ब्यर्थ छ
जानै परे नदि पारि लर्खराउनु ब्यर्थ छ ।
आफ्नु घरमा नअटेर बृद्धाश्रममा आमा राखे
सेवा गर्छु तिम्रै भनी बर्बराउनु ब्यर्थ छ ।
बटुलेर बुचर बनियाँ ताला-साँचो सुम्पिएमा
बेच्नै आँट्यौ देशै भनी चर्चराउनु ब्यर्थ छ ।
हरितालको गुण बोकी ज्यानै लिन आतुर भए
पिप्लमेट हुँ भन्दै जिभ्रो पर्पराउनु ब्यर्थ छ ।
राष्ट्रियता ओठमा टाँसी छातीभित्र प्रवास भए
घरको छतमा चुच्चे झण्डा फर्फराउनु ब्यर्थ छ ।
२०७३ साउन १
काठमाडौ
Subscribe
Login
0 Comments
Oldest
