नेपाली हास्यव्यङ्ग्य अनलाइन पत्रिका

मन्त्री त गर्दछु भनेर जुटेर जाला
जो मन्त्रणा गरिदिने सब बुझ्छ चाला {{read_more}}
यो पाँच वर्षपछि फेरि चुनाव होला
जोडेर राख्न नसके तरिंदैन खोला ।।

लागेर पुच्छर यहाँतक बल्ल आयो
भोकै बस्यो र पटुका बलले लगायो
मौका मिल्यो अब कहाँ अझ मूर्ख बन्नु
लौ है प्रभो बल गरौं यति नै छ भन्नु ।।

के गर्नु पर्छ र अरू अति खट्नु छैन
सानै सही गरिदिए पनि हुन्छ चैन
हामी मिलाउन सिपालु यता छँदैछौं
जस्तै अनर्थ पनि अर्थ गराइदिन्छौं ।।

को पो फँस्यो र अझसम्म सही गरेर
कल्ले झिक्यो र कहिले ढुकुटी भरेर
होस् अर्ब खर्ब ऋण हो पनि भन्नु हुन्छ
जाने गए जुन उही पथ हिंड्नु हुन्छ ।।

यो जिन्दगी जुन मिल्यो पछि फेरि के हो
चोखो रहेर पनि भोक सहेर के भो
लत्काउनै उचित देख्छु कृपानिधान
हाडै दिए पनि खुशी छु झिंजो नमान ।।

काठमाडौं