नेपाली हास्यव्यङ्ग्य अनलाइन पत्रिका

दिव्य गिरी :

१.
आऊ हामी फुटेका फेरि जुटौँ
विपक्षीलाई तर्क-वितर्कको टुक्काले कुटौँ
सर्वमान्यले उहिल्यै भेडा भनेका थिए
तिनैलाई पहिलेको भन्दा बढी लुटौँ ।

२.
तिमी व्यङ्ग्य गाऊ म तेसैमा ताल दिन्छु
तिमी जसो भन्छौ म त्यस्तै चाल दिन्छु
परोस् नपरोस् अभिनय गर्न जानेकै छौ
तिमी ठूलो माछा भगाऊ म जाल दिन्छु ।

३.
हामीले राजा लखेटेको राजा हुनलाई हो
हामी रुपान्तरण भएको ताजा हुनलाई हो
परिवर्तन भनेको छुमन्तर गर्ने हो र ?
हामीले बाँसुरी फुकेको बाजा हुनलाई हो ।

४.
हामीले गरेको नदेख्नेहरू अन्धभक्त हुन्
हामीलाई गाली गर्नेहरू दिमागी अशक्त हुन्
आफूले खान नपाएपछि अङ्गुर अमलो हुन्छ
भ्रष्ट, तस्कर, माफिया सबै पुत्र सशक्त हुन् ।

०००
काठमाडौं