नेपाली हास्यव्यङ्ग्य अनलाइन पत्रिका

अमर अधिकारी :

१.
(बसमा यात्रा गर्दैगर्दा)
पछाडि सिटका यात्रुः ओ भाइ ! मोबाइल झर्‍यो ।
अगाडि सिटका यात्रुः मोबाइल हैन, मोबाइलको कभर हो, काम नलाग्ने भएर फालेको ।
पछाडि सिटका यात्रुः त्यसरी जथाभावी फाल्ने हो त बसभित्र फोहोर ?
अगाडि सिटका यात्रुः नेपाली भनेर चिनिनुपरेन? कहिले बदामका खोस्टा फाल्छौँ, कहिले चकलेटका ।

२.
(क्यारेटबाट एकपोका दूध हातमा लिएर हजारको नोट दिँदै)
ग्राहकः पैसा काट्नुस् त साउजी !
साहुः विचरा हजारको नयाँ नोट रहेछ, कैँचीले काटम् कि ब्लेडले ?

३.
(पुस्तक प्रकाशन भएपछि)
प्रकाशकः पुस्तकको विमोचन कहिले गर्ने त लेखकज्यू ?
लेखकः ऋण लिएर छपाइ खर्च जुटाएको छु, विमोचन नगर्ने, घाटा हुन्छ।

४.
(तीनजना पेशागत परिचय गर्दै)
पहिलोः म चोपा अर्थात् चोरी र पाकेटमारी
दोस्रोः म ब्याठे अर्थात् ब्यापारी र ठेकेदारी
तेस्रोः म साले अर्थात् साहित्य र लेखन

५.
(दुईजना वनमा घाँस काट्दै)
निर्मलाः घाम डुबिसक्यो, घर जाउँजाउँ !
उर्मिलाः घाम हैन, सूर्य हो डुब्ने ।

६.
(शेयर कारोवारी बन्ने उद्देश्यले काठमाडौँ आएपछि)
वीरबलः नेप्टेको अफिस कता होला?
बलवीरः नेप्टे हैन होला नेप्से होला। नेपाल स्टक एक्सचेञ्जको छोटकरी रुप।

०००
खुंग्री, रोल्पा
हालः बुढानीलकण्ठ, काठमाडौं