नेपाली हास्यव्यङ्ग्य अनलाइन पत्रिका

अमर सन्तति

१.

गिजोलेर मनस्थिति सपना भाँड्न आउने होला
जनताका सुन्दर ती सपना फाँड्न आउने होला
पचाएर लाजघिन अनि लुकाएर स्वार्थी पन,
चुनाव आयो फेरि पनि सपना बाँड्न आउने होला ।

२.
मनभरि पाप दम्भ विष र रोष भएकाहरु
विवेकहीन मानवताहीन दोष भएकाहरु
सधैँ कर्कस बनी कुर्लिरहन्छन् बिनसित्तिमा,
आफूलाई नै महान् ठान्ने उद्घोष भएकाहरु ।

३.
मुसा उफ्रेको देखेर म्याउ पनि छक्क पर्छ होला
डकार डुक्रेको देखेर ढ्याउ पनि छक्क पर्छ होला
यो देशमा बग्रेल्ती बिना उत्पादनका खेतीपाती ती-
पार्टी उम्रेको देखेर च्याउ पनि छक्क पर्छ होला ।

०००
भक्तपुर