नेपाली हास्यव्यङ्ग्य अनलाइन पत्रिका

भेषजराज साहित्य प्रतिष्ठान, वालिङ स्याङ्जाले आफ्नो नियमित रचनावाचनको ५० औँ स्वर्ण शृङ्खला वालिङ बहुमुखी क्याम्पसको सभाहलमा गुरु पूर्णिमामा एवम् २०९औँ भानु जयन्तीका दिन २०७९ असार २९ गते सम्पन्न गरेको छ ।

कार्यक्रमका प्रमुख अतिथि भेषजराज शर्माका सहकर्मी एवम् पूर्व प्रधानाध्यापक चिरञ्जीवी पाण्डेले शर्माको व्यक्तित्वमाथि प्रकाश पार्दै शर्मा साहित्य, शिक्षा र राजनीतिका त्रिवेणी हुनुहुन्थ्यो । उहाँका साहित्य गुणात्मक छन् । उहाँका रचनाले समाजका विकृति-विसङ्गतिको चर्को आलोचना सहित समाज सुधारको सन्देश दिएका छन् भन्नेकुरा बताउनु भयो ।

कार्यक्रमका अर्का अतिथि भेषजराज शर्माका समकक्षी नरबहादुर पराजुलीले शर्मा स्याङ्जाको मात्र नभई नेपालकै उत्कृष्ट साहित्यकार हुनुहुन्थ्यो भनेकुरा व्यक्त गर्नुभयो । कार्यक्रममा प्रतिष्ठानका सल्लाहकार डा. अच्युतशरण अर्याल, खुकान्त अर्यालले शुभकामना मन्तव्य राख्नुभएको थियो ।

कार्यक्रममा शिव खनाल जीवमले कविता र झर सुनाउनुभएको थियो । त्यसैगरी बाल प्रतिभा विप्लव खनाल र कृष्ण वास्तोलाले भानुभक्तका कविताहरू वाचन गरि भानुभक्तप्रति श्रद्धा सुमन अर्पण गरे । कवयित्री वसन्ती अधिकारीले गरु भक्तिसम्बन्धी उत्कृष्ट कविता प्रस्तुत गरिन् भने कविहरू लेखनाथ काफ्ले, बोधराज न्यौपाने, कमल बगाले, पारीश्वर न्यौपाने, गोविन्द वास्तोला, दमकुमारी बगाले लगायतले समसामयिक रचना सुनाएका थिए ।

कार्यक्रमको अध्यक्षता प्रतिष्ठानका अध्यक्ष यमकान्त खनालले गर्नु भएको उक्त कार्यक्रममा स्वागत मन्तव्य प्रतिष्ठानका उपाध्यक्ष विष्णुप्रसाद अर्यालले दिनुभएको थियो भने धन्यवाद ज्ञापन प्रतिष्ठानका सदस्य दीपक लम्सालले र सचिव श्यामप्रसाद ढुङ्गानाले सञ्चालन गरेका थिए । ८ देखि ८३ वर्षसम्मका स्रष्टाको उपस्थितिले कार्यक्रम अझ महत्त्वपूर्ण बनेको थियो ।

-श्याम ढुङ्गाना