नेपाली हास्यव्यङ्ग्य अनलाइन पत्रिका

न कामवासना हुन्छन् न राग यौनका कतै
न स्वार्थ सूत्र डोरिन्छन् न छन् लालसमा कतै !
न पाउ हिँड्न नै सक्छन् अधर्मका उठी पर
वृद्धबेला छ ह्यूँजस्तै चुली विचार सुन्दर !!

न लोभ राल जिब्रामा न छन् सञ्चयका घर
न क्रोधका चली ज्वाला जल्दछन् अरुका घर !
न छली छलका जाँता घुम्दछन् दिलका घर
वृद्धबेला अहा ! कस्तो ह्यूँचुली अझ सुन्दर !!

न कामका कतै टण्टा न दास छ अफिसको
न चाकरी कतै वेत लौरीझैँ बदमासको !
विश्वासको यता ब्रह्म निस्केको छ मनोजग
सममा समसौन्दर्य ह्यूँचुली वृद्ध जग्मग !!

तराजु न्यायका सोझा जे हो त्यो बोल हिम्मत
बोल्दै समाजमा हुन्छ साँच्चै अमृत अमृत !
न पाऊँ लालसा हुन्छन् गुमेमा बन्छ सुन्दर
वृद्ध बेला सफा साँच्चै साँच्चै यो छ मनोहर !!

जन्मदा मोहका भारी हुन्छन् खराबका जन
धोई फाली पखालेर बेला यो बन्छ कञ्चन !
कला भए अझै अग्लो अग्लने बन्छ ह्यूँचुली
वृद्ध बेला सबै सामु पग्लने बन्छ यो चुली !!

चुलीभन्दा अझै माथि मनको चम्कने फुली
न पर्छ गफले ढाँड्नु गाउँ छिमेकमा डुली !
न उन्माद भरी तात्छन् दिमाखका कुनै नसा
वृद्ध बेला छ जम्मै यो शीत शान्त मनोदशा !!

ढिँडो नरमको चट्ट खायो गुन्द्रुकको रस
नाङ्गै बसे यता हुन्छ कोठामै गरी उठ्बस !
न वस्त्रको कुनै सोख जिब्रो रहन्न स्वादमा
न लेनदेन झञ्झा छन् अङ्कगणित म्यादमा !!

चञ्चले हठ छन् बाल्य हुन्न त्यो रहने पल
किशोर दूर आक्रोश रहने हुन्न क्यै छल !
न पत्नी प्यारकी लट्ठी न परिवार स्वार्थका
ऋषिकुँजन संसार सारा अर्थ समर्थका !!

स्वच्छ सागरझैँ छल्का मन छल्छल छल्छल
जम्मै शीतलको आड अपार पार पल्पल !
विचार समको ज्वार तरङ्गी मन निर्मल
जहाँ छन् वृद्धका आँखा स्थल ती अझ झल्मल !!

०००
काठमाडौ