बुढ्यौली काव्य शृङ्खला (४१)
वृद्धवाङ्मयले गर्दा मिल्छ ऊर्जा निरन्तर । सिद्ध युवक हून्, हाम्रा कार्य साधनमा तर ॥ उपदेश दिने गर्छौं सत्य श्रीकृष्णझैँ अनि । कर्ममा हून्, युवा हाम्रा नित्य अर्जुनझैँ बनी ॥
देवीप्रसाद मिश्र :
असी श्रावणको मास अन्त्य पच्चीसका दिन ।
निरीक्षण गरी हिँड्थ्यौँ वृद्ध चिन्तनका जन ॥ (२३०)
गोधूलिको थियो वेला शुभ्र आकाशमा छवि ।
हतारिँदै थिए आफैँ डुब्नलाई उता रवि ॥२३१॥
पाँचभाइ बुढा हामी पञ्चरत्न समानका ।
भेटियौँ टोलमा हिँड्दा बात छाँट्यौँ तमामका ॥२३२॥
बाला युवा सबै साथ राख्दछौँसम आदर ।
जिम्मेवारसँगै हाम्रो अधिकार बराबर ॥२३३॥
हीनता बोधमा हामी आफ्ना जीवन खातिर ।
जाँदैनौँ कहिल्यै दामी सोच राख्छौँ निरन्तर ॥२३४॥
नयाँ पुस्ता कुनै हाम्रा दीनहीन नहून् तर ।
आशीर्वाद समालेमा हुन्छ जीवन सुन्दर ॥२३५॥
घामपारी मिले हाँस्छन् जहिल्यै फाँटका गरा ।
ढुङ्गो माटो मिलेकाले अडिएझैँ वसुन्धरा ॥२३६॥
वृद्धवाङ्मयले गर्दा मिल्छ ऊर्जा निरन्तर ।
सिद्ध युवक हून्, हाम्रा कार्य साधनमा तर ॥२३७॥
उपदेश दिने गर्छौं सत्य श्रीकृष्णझैँ अनि ।
कर्ममा हून्, युवा हाम्रा नित्य अर्जुनझैँ बनी ॥२३८॥
समाज उक्लियोस् माथि नलिएर कुनै भय।
युवा अगाडि राखेर गर्दछौँ वृद्धनिर्णय॥२३९॥
०००
२०८०/४/२६,