नेपाली हास्यव्यङ्ग्य अनलाइन पत्रिका

दीनानाथ पोख्रेल :

द्यौता, बच्चा र राजा तिनसित मनले हार मान्नेछ जान्नू ।
दोस्रा कोही भएमा वचन मनुजका बिक्दछन् सत्य ठान्नू ॥
पक्रेमा न्याय बाटो सडक सहजको खुल्छ चिन्ता पछारी ।
बाबाआमा रमाऊन् हरदिन घरमा मिल्छ उल्लास भारी ॥८१॥

बस्दा आफ्नै थलामा श्रमफल बटुली गेहमै लेउ लाग्छ ।
खोज्दै नौलो हिँडेमा मनुज अवनिमा जान यो छेउ लाग्छ ॥
लागौँ आफ्नै थलामा श्रम कृत पथमा पोख्न होऔँ तयारी ।
बाबाआमा रमाऊन् हरदिन घरमा मिल्छ उल्लास भारी ॥८२॥

छोडी सत्कर्म आफ्ना भवन वन हुने मार्ग नौलो नरोजौँ।
चुन्दै सत्कर्म पस्की मृदु फल घरमा हुल्न सन्मार्ग खोजौँ ॥
वैरी सन्ताप भाग्छन् कृत फल बटुले दिव्य आभा उमारी ।
बाबाआमा रमाऊन् हरदिन घरमा मिल्छ उल्लास भारी ॥८३॥

ईर्ष्या डाहा हटाई शुभपथ नबढे पोल्छ टन्टा बढेर ।
हामी लम्कौँ क्रियामा असल पथ चुनी प्राप्तिमाला जडेर ॥
बढ्दै सायुज्य पक्रौँ शुभफल घरमा पस्छ आशा उमारी ।
बाबाआमा रमाऊन् हरदिन घरमा मिल्छ उल्लास भारी ॥८४॥

चिन्ता वैरी लगारूँ हितमय घरमा छिर्छ ज्योत्स्ना सुनौलो।
मिल्नेछन् हर्ष सङ्ला हितपथ म बढे खुल्छ शोभा रुपौलो ॥
मिल्दा सायुज्य अग्लो नरमन सुखमा झुम्छ आशा उमारी ।
बाबाआमा रमाऊन् हरदिन घरमा मिल्छ उल्लास भारी ॥८५॥

०००
सुम्बेक, इलाम नगरपालिका वडा नं ०२, इलाम