नेपाली हास्यव्यङ्ग्य अनलाइन पत्रिका

कृष्णप्रसाद पौडेल `जस्ताघरे´:

आमा बा सृष्टिकर्ता सकल मनुजका ईश हुन् सर्वमान्य ।
चासो राख्दा सुताका सुत सबजनका आज हुन्छन् अमान्य ।।
आफ्ना ती स्वार्थ रोज्दै सबल सुत वधू रम्दछन् एकसाथ ।
बस्छन् बा मातृ वृद्धाश्रम विवश भई देखियो पक्षपात ।।-१

आमाका मात्र धेरै विविध गुण कथा गाउँछन् बारबार ।
बाबाका दिव्य अर्ती सिप र तपसका बुझ्छ को सत्य सार ?।।
आमा खट्छिन् सदाझैँ घर वरपरका काजमा गर्वसाथ ।
बाबाका मर्म तोड्ने नर कमसल हुन् देखियो पक्षपात ।।-२

सासूआमा बुहारी विच मिलन हुँदा खासमा हर्ष मिल्छ ।
सासू ठान्छिन् बुहारी अधमसरि भने गेह कल्ले सिँगार्छ ?।।
यस्तै चाला उमार्छन् दिनहुँ यदि भने हुन्छ व्यर्थै प्रभात ।
छोरी जस्तै बुहारी मुटुसरि नहुने देखियो पक्षपात ।।-३

सासू आफ्नै मुमाझैँ असल अदिति हुन् भन्न चुक्छन् बुहारी ।
सासूका पुत्र आफ्नै खसम हजुर हुन् सर्व कल्याणकारी ।।
सासूका मर्म पीडा हरपलपखमा चढ्दछन् गाथगाथ ।
आफ्नै सासू वधूका प्रियजन नहुने देखियो पक्षपात ।।-४

स्वास्नीका बात सुन्दै सुत पनि सहजै बस्छ घोक्रो फुलाई ।
बा आमाका व्यथाका चरण चरण झन् बढ्दछन् हेर भाइ ।।
हाँस्ने, नाच्ने र घुम्ने रहर सब गए देह मात्रै छ साथ ।
बा आमा व्यर्थ ठान्ने चलन सुरु हुँदा देखियो पक्षपात ।।-५

०००
वि.न.पा.-४, नुवाकोट । हाल: माछापोखरी, काठमाडौँ ।