नेपाली हास्यव्यङ्ग्य अनलाइन पत्रिका

देवीप्रसाद मिश्र :

सदिच्छामा बग्दै विविध दुखपर्दा अभरमा ।
सदा जुट्ने गर्छन् कहर पर फाल्दै रहरमा ।।
बला आफू बन्दै,प्रतिपल थलामा अनुजका ।
खुसी मान्दै हाँस्छन् हरबखत यी वृद्ध घरका ।।१।।

सदा एकै हुन्छन् अभर-भरमा लक्ष्य उनका ।
न ता खाेज्छन् केही अनुजसितमा हार सुनका।।
दिए लिन्छन् माया मृदुमन बनाई सकलका ।
खुसी मान्दै हाँस्छन् हरबखत यी वृद्ध घरका ।।२।।

बसी भाेकै नाङ्गै सुखसयलकाे आस नगरी ।
भरी राख्छन् हाम्रो उदर दरले आदर गरी ।।
विधाताका दाता सरह भरिला कार्यतहका।
खुसी मान्दै हाँस्छन् हरबखत यी वृद्ध घरका ।।३।।

निराशामा आशा प्रतिदिन जगाई पथिकमा ।
हिँडाएका हुन्छन् अघि अघि सदा लाेकहितमा ।।
बिलासीका लाछी परपर हटाई हृदयका ।
खुसी मान्दै हाँस्छन् हरबखत यी वृद्ध घरका ।।४।।

सिकाई आस्थाका मन-वचनले जीवन कला।
चढाई छाड्ने छन् अति कठिनले शाश्वत तला ।।
अझै जान्छन् टाढा, परिजन पलामा रहरका ।।
खुसी मान्दै हाँस्छन् हरबखत यी वृद्ध घरका ।।५।।

०००
काठमाडाैं