नेपाली हास्यव्यङ्ग्य अनलाइन पत्रिका

फाल्गुण कृष्ण त्रयोदशी तिथि ‘शिवरात्री पर्व रे । हैन यो शिवरात्री हो कि शिवदिन ? रात्री भन्छन् अनि बिहानदेखि दिनभर चारतिरबाट लाइन लागेर पशुपतिनाथ दर्शन गर्ने दर्शनार्थीको भिडभाड हुन्छ । स्वयम् सेवकहरूलाई लाईन व्यवस्थित गर्न नै धौ धौ परेको देखिन्छ ।

नेता महान् नेतादेखि राष्ट्रपतिसम्म लाइनमा बसेका दर्शनार्थीहरूलाई बेवास्ता गरी तितरवितर पार्दै दर्शन गर्ने गर्छन् । शिवरात्री भनेपछि त राती पो दर्शन गर्नुपर्ने हैन र ? बुझ्न गाह्रो भयो । मन्दिर परिसरमा अनेक थरीका भस्मे साधुहरू खरानी घसेका नग्नता देखाउँदै शिवबुटी फुकिरहेका हुन्छन् । शिवजीको दिन भएकोले गर्दा यस्तो रुपलाई छुट दिइएको होला । शिवजीले भष्म दलेर भांङधतुरो खाएर मैमत्त भएर हिंड्ने गरेका थिए रे भन्ने उक्तिको सहारामा यी साधु भनाउँदाहरूले आफ्ना गोप्यता भंग गर्दै दंग परेर बसेका होलान् सायद ।

बाफरे बाफ ! शिवजीको दर्शनार्थ युवतीहरूको तछाडमछाड, लछारपछार, खाँदाखााँद, ठेलमठेल अनि पेलमपेल पार्वती हुन नपाइने हो कि झै गरी अझ भोकै पेट, चक्कर लागेर ढलौंला कि झै गरी हुत्तिन्छन् । पशुपतिको दर्शन वर्षका अन्य दिनहरूमा पनि गरेकै हुन् । आजै चाहिँ के फरक देखिन्छ होला शिवलिङ्गमा ? कि दिव्य दर्शन नै दिनुहुन्छ हौ ? स्वस्थानीमा शिवजी विरक्तिएर नाङ्गै हिंड्दा ऋषिपत्नीहरू पछिपछि लागेर गएको कुरा उल्लेख छ । धन्न हाम्रा पत्नीहरू पछि नै चाहिं लाग्या छैनन् ।

बालबच्चाहरू बिहानै बाट्बाटोमा डोरी टाँगेर जगात मागेर बसेका हुन्छन् । पैसा चडाउने सजिलै जान पाउने तर पैसा दिन गाह्रो मान्नेहरूलाई बाटो नछाडेर तिरिखिरी पार्ने । बच्चाहरूको चाहिं शिव बिहान होला कि के हो ? सककझमा धुनी बालेर हुनिनहुनी मिल्नेनमिल्ने मादक पदार्थ सेवन गरेर लठ्ठ परेर बस्नेको चाहिं साँचो अर्थमा शिवरात्री भन्न मिल्ने बरु ।

जे होस्, आज शिवरात्रीको दिन हो । बिहान जगात थाप्ने जगाती, दिनमा पशुपतिमा लस्कर लाग्ने लस्करी, यही मौकामा मादक पदार्थ ओसार्ने तस्करी, नांगा बाबाको देखेर मसक्क पर्ने मस्करी देखी बडेबडे महान् नेताहरू सबैमा महाशिवरात्रीको मंगलमय शुभकामना छ ।

०००
जय शम्भो ! जय भोले !! हरहर महादेव !!!