नेपाली हास्यव्यङ्ग्य अनलाइन पत्रिका

बद्रीप्रसाद दाहाल :

जे-जे पनि मिठो मान्ने मुखै चेपारे म ।
थुप्पा मम भुटन करी रूच्ने बेसारे म ॥

जेरीपुरी रसबरी पेडा बर्फी आहा ?
केरा दही तर घिउ भकुर्नै छ चाहा ॥

वाइन र बियरका सिसी लडाउँछु ।
मासु नभै ज्युनार हुन्न भनी कराउँछु ॥

घुमडुल प्राणायम ध्यान योगा पिटी ।
गरूँ भने अल्छी लाग्छ, बस्छु दाह्रा किटी ॥

खेलाँचीमै उल्र्यो भुँडी भन्छन् सबै भुँडे ।
घ्याम्पे बङ्गुर हात्तीपेटे उपनामै के के ?

उत्तानो त सुत्नै हुन्न, यमराजको भय ।
वोल्टेकोल्टे फिर्दा पनि बनिन्छ कि लय ॥

दमाहा नै ठम्याएर नाति गजा हान्छ ।
अगस्ति यो मुख मोरो आँखा चिम्ली खान्छ ॥

ट्याम्पोवाल भन्छन् सोझै डबल लाग्छ भाडा ।
आन्द्रे थैलो फट्टिएर परेँ हालाबाला ॥

कसरत एक्सरसाइज खालि भकुर्नेछ ।
स्वाँफाँ- स्वाँफाँ गर्दा पनि खानै दकुर्नेछ ॥

भुँडे-भुँडे गठबन्धन गर्नै क्वै मान्दैन ।
सतीको नै श्राप हो कि नाम क्वै भन्दैन ॥

०००
धादिङ ।