तन्नेरीका चिन्तन
तन्नेरी उठ उठ्नु पर्छ अहिले, जागा र ताजा हुँदै । मात्रै चाकर वृद्धको कति हुने, पुड्का र भुँड्का रूँदै॥ स्वार्थी फेलर भ्रष्टकै पछि हिँडे तारूण्य बेकार छ । दासै दास र भाटमात्र गनिए तारूण्य धिक्कार छ ॥
बद्रीप्रसाद दाहाल :
तन्नेरी उठ उठ्नु यो नियम हो, हामी खुशी बन्दछौँ ।
तिम्रै पौरख पोखिँदा मुलुकमा, हामी सबै रम्दछौँ ॥
होओस् कानुनराज देशभर नै भन्ने इरादा बुनी ।
छान्यौँ सांसदमा युवाजन कयौँ हिँड्छौ गफाडी बनी । १॥
राजा झैँ सुविधा र सोख रमिता, गर्दै हिँडे वृद्धले
मात्रै मोज र भोज जीवन भनी, ठम्याउँदै चित्तले ॥
वाचा बिर्सिदिए गरेर झगडा, अन्योल भो देशमा ।
बूढाका पगरी थुतेर अहिल्यै राख्द्यौ नयाँ केशमा ॥२॥
तन्नेरी उठ उठ्नु पर्छ अहिले, जागा र ताजा हुँदै ।
मात्रै चाकर वृद्धको कति हुने, पुड्का र भुँड्का रूँदै॥
स्वार्थी फेलर भ्रष्टकै पछि हिँडे तारूण्य बेकार छ ।
दासै दास र भाटमात्र गनिए तारूण्य धिक्कार छ ॥३॥
नौला दृष्टि सुसृष्टि लक्ष्य नभए, तारूण्य चित्कार हो ।
नेपाली जनभावना बुझिदिने, तारूण्य स्वीकार हो ॥
उस्तै कार र हार भव्य बङला भोगी गरे चिन्तन ।
के झुल्कन्छ बिहान देशभरि नै ? उम्दा नभै मन्थन ॥४॥
०००
धादिङ