अनि कविता किन लेख्नु ?
हलुका खेल छैन देश बनाउन अनि असनको साँढे संसदमा लडिरहेको बेला कसले कलम अचाउँछ विचारको लडाइँमा कसले पो दियो जलाउँछ अनि किन कविता लेख्नु ?
हामी टाटेपाङ्ग्रे दौरा उन्नेलाई
मज्जाले महापुरुष बनाउछौँ
हामी बामे सरेको गठबन्धनलाई
आचपन गर्न हाकिम बनाउछौँ
हामी पेट उकास्न
कतै गोठालोलाई श्रीपेच भिराउछौँ
हामी कतै पेटमा ड््याम्म हान्न
सुकेको सिन्कालाई लौरो बनाउछौँ
सुकिलो मानिसको अस्तित्व धरापमा परेको बेला
अनि किन कविता लेख्नु ?
दुनियाले कविताको परिभाषा
नयाँ खोजिरहेको बेला
टाटेपाटे बैँश हराएको बेला
रङ्गविहिन आकाशमा बेहुलाको लागि इन्द्रेणी खोज्छौँ
कविताको अमिलो रागमा हात धुनुपरे पनि
धमिलो रङ्ग हाल्नु
हामी भित्रभित्रै निथ्रिएको बेला
किसानको धुलौटे मुटु माटोमा खिएको बेला
हाम्रो स्वार्थ फाटेको बेला
अनि कलमलाई दैनिक पाठपूजा गरेर
किन कविता लेख्नु ?
पिकनिक गएजस्तो सजिलौ छैन देश बनाउन
अँधेरी रातमा रत्यौली खेलेजस्तो
हलुका खेल छैन देश बनाउन
अनि असनको साँढे संसदमा लडिरहेको बेला
कसले कलम अचाउँछ
विचारको लडाइँमा कसले पो
दियो जलाउँछ
अनि किन कविता लेख्नु ?
०००
हालः सिड्नी अस्टेलिया
२०७९ आश्विन १