नेपाली हास्यव्यङ्ग्य अनलाइन पत्रिका

(मान्छे कविता श्रृङ्खलाको २७ औँ भाग)

पेसा धर्म कला अनेक गणका, हुन्छन् यहाँ मानिस ।
मान्छे बन्छु भनेर उच्च गतिलो, गर्नू अझै कोसिस ।।
होला शान्ति खुबै यहाँ मनुजले, सद्भाव राख्यो भने ।
बन्ला देश उँचो यहाँ भगतझैँ, मान्छे बनेछन् भने ।।-१

भन्छन् डाक्टरको बडा वकिलको, उम्दा छ पेसा यहाँ
मान्छे बन्न सकेन उत्तम भने, मिल्ला र सेवा कहाँ !!
राम्रो ज्ञान र बुद्धि छर्न गुरु ती, द्यौता समानै बनून् ।
चेला हून् सब एकलब्य सरिका, मान्छे विधाता बनून् !!-२

फल्ला अन्न किसान कर्म गतिलो, चाहिन्छ भन्छन् जन ।
खालान् मानिस पोसिलो र भरिलो, सक्लान् कि मान्छे हुन ।।
हाम्रा ती सब राष्ट्र सेवकहरू, ती कर्मचारी सब ।
आर्मी ती प्रहरी समस्त जनता, मान्छे बनून् ती अब !!-३

होला उच्च विकास यो मुलुकमा, मान्छे बनून् सुन्दर ।
ठेकेदार इमानदार नभए, बिग्रन्छ हाम्रो घर ।।
हाम्रा सन्तति ती अमूल्य धन हुन्, छोरा र छोरी सब ।
त्यागून् आज कुकर्म उग्र झगडा, मान्छे बनून् ती अब ।।-४

डाँका चोर दलाल भ्रष्ट ननिको, बन्दै नबन्नू कबै ।
मान्छे बन्न सकून् यहाँ मुलुकका, नेता र मन्त्री सबै ।।
खानू कर्म गरी सबै मनुजले, धर्ती हुने छिन् खुसी ।
मान्छे बन्नु हुँदैन यो मुलुकको, भेडा र बोका खसी ।।-५

०००
बट्टार, नुवाकोट । हाल, बालाजु, काठमाडौं
मोबाइल नं. ९८४१७५८१८४