नेपाली हास्यव्यङ्ग्य अनलाइन पत्रिका

तिमी मन्दिरभित्र बस्छौ भगवन्
बाहिर अत्याचार छ
तिमी आँखा चिम्लीरहेछौ
बाहिर मारामार छ ।

कति स्वार्थी कामको लागि
भेटीपाती चढाउँछन्
तिमी मौन सम्मति जनाउँछौ
तिम्रो आस्थाको अनुशरणले यहाँ
भ्रष्टाचारी बनाउँछौ
तिमी शिखरमा बस्छौ भगवन्
तल भीरमा मृत्युधार छ
तिमी आँखा चिम्लीरहेछौ
बाहिर मारामार छ ।

तिम्रो धर्मको न्याय कस्तो
यहाँ अधर्म बढिरहेछ
तिम्रो मन्दिरको ढोका अगाडि
सोझो बली चढिरहेछ
तिमी सुन्दर महलमा पस्छौ भगवन्
यहाँ झुप्रोमा दुखको पारावार छ
तिमी आँखा चिम्लिरहेछौ
बाहिर मारामार छ ।

तिमी राजनीतिमा पस्न चाहन्छौ
तिमी कुर्शीमा पनि फस्न चाहन्छौ
तिम्रो कृत्रिम आस्था उराली
सडक धाउँने चाकरहरूलाई
सामन्तवादी खरानी घस्न चाहन्छौ
तिमी नसुने झैं गर्छौ भगवन्
यहाँ स्वार्थी छेकाबार छ
तिमी आँखा चिम्लिरहेछौ
बाहिर मारामार छ ।

०००
गौरादह, झापा