नेपाली हास्यव्यङ्ग्य अनलाइन पत्रिका

दुर्गा रिमाल अधिकारी :

१. नेताज्यू, म हलन्ते
होइन, गफन्ते होइन,
म झगडन्ते होइन,
लडन्ते होइन,
तपाई जे सोच्नुहुन्छ,
यी सबैमा एक सोच्नु नै होला ।
जे सोचे पनि तपाईंलाई
निष्ठाको नमस्कार ।

२. भगवानको शरण जाने,
भक्ति गर्ने पनि गर्छन्
तर म भगवानको शरण जाने
र भक्ति गर्नेमा पटक्कै पत्यार गर्दिन ।
म त नेता भक्ति तथैवच,
अहं नेता शरणं गच्छामि,
नेतृ शरणं गच्छामि, घूस नखादामि,
घूस लिन कर जोडामि,
यिनै नेताको शरणं गच्छामि भन्न चाहन्छु ।
यिनै नेतालाई निष्ठाको
नमस्कार भन्न चाहन्छु ।

३..देशभक्ति भनेको कुन चरीको नाम हो,
म त्यो पटक्कै जान्दिन हाम्रा वीर मरे,
बाजे बराजु मरे त्यो म जान्दिन,
मैले मर्नुपर्छ कि पर्दैन,
त्यो पनि म जान्दिन,
तर भूमि भने पटक्कै मर्दैन,
भूमि जस्तै अमर, अजर अविनाशी बन्ने
नेताको शरण पर्दछु ।
यिनै नेतालाई कर जोडी
दश औंलाको नमस्कार गर्दछु ।
यस्तै विनित नेतालाई
निष्ठाको नमस्कार भन्न चाहन्छु ।

४.सास हुनेको लाश हुन्छ
तर आत्मा भने चिरञ्जीवी हुन्छ ।
गीतामा कृष्णले अर्जुनलाई
यिनै कालजयी दृष्टान्त
सिकाउनुभएको छ ।
यस्तै कालजयी नेतामा
निष्ठाको नमस्कार ।

०००
कलङ्की, काठमाडौं